जिल्ला प्रहरी कार्यालय (जिप्रका) बाराले तराईवासीहरुको महान् पर्व होलीलाई सभ्य ढंगले मनाउन सबैमा अनुरोध गरेको छ ।
पछिल्लो समय होली पर्वका नाममा बृकिती बढ्दै गएको भन्दै जिप्रका बाराले विज्ञप्ती मार्फत होली पर्वलाई सभ्य र मर्यादित ढंगले मनाउन जिल्लावासीमा अनुरोध गरेको हो ।
तराईमा यस वर्ष विहिवार (चैत ७ गते) होली पर्वका लागि सरकारले सार्वजनिक बिदा दिएको छ । रंगहरुको पर्व मानिने यस पर्वलाई अन्य प्रदेशको तुलनामा प्रदेश नं २ का सर्वसाधारणले भव्य रुपमा मनाउने गर्दछन् ।
तराईमा होली पर्व शुरु हुन सातादिन अघि देखि नै पर्वका नाममा जबरजस्ती रंग लगाईदिने , मदिरा सेवन गरेर होहल्ला मच्चाउने, मदिरा सेवनगरी तिव्रगतिमा सवारी साधन चलाउने प्रवृती बढदै गएको छ ।
जिप्रका बाराले सार्वजनिक गरेको सुचनालाई अटेर गरेर पर्वका नाममा जबरजस्ती दुषित पानी र रंग लगाईदिने , मदिरा सेवन गरी होहल्ला मच्चाउने, असुरक्षित ढंगले तिव्र गतिमा सवारी साधन चलाउने, बटुवाहरुलाई जबरजस्ती गर्नेलाई कानुनी कारवाहि गर्ने चेतावनी दिएको छ ।
जिल्ला प्रहरी कार्यालय बाराका प्रमुख प्रहरी उपरिक्षक (एसपी) सानुराम भट्टराईले पर्वका नाममा गलत काम गर्नेलाई कानुनी कारावाहीको दायरमा ल्याउने जनाउनुभएको छ । ‘होलीको दिन हामीले दिनभर जिल्लाभर ठाँउ ठाँउमा मापसे चेकजाँच गर्ने कार्यक्रम राखेका छौं, यदि कसैले हामीले सार्वजनिक गरेको सुचना विरुद्ध गएर पर्वका नाममा गलत काम गर्छ त्यो कारवाहीको भागिदार हुन्छ ’ प्रहरी प्रमुख एसपी भटट्राईले भन्नुभयो ।
प्रतिक्रिया दिनुहोस