१४ चैत नेत्रविक्रम चन्द विप्लव नेतृत्वको ‘नेकपा’का स्थायी समिति सदस्य हेमन्त प्रकाश ओली ‘सुदर्शन’लाई सर्वोच्चमा उपस्थित गराई थुनामुक्त गराउन छोरी विपना ओलीले सर्वोच्चमा बन्दी प्रत्यक्षीकरण रिट दर्ता गरेकी छिन् । बुधबार हेमन्त ओली, लोकेन्द्र खड्का र विपना ओलीको नाममा सर्वोच्चमा दर्ता रिटमा पक्राउ गरेकालाई निःशर्त अदालतमा उपस्थित गराई रिहाइको लागि आदेश जारी गर्न आग्रह गरिएको छ ।
ओलीले बुबा हेमन्त प्रकाश र दाइ लोकेन्द्र खड्कालाई सरकारले गैरकानुनी रुपमा थुनामा राखेको दाबी गर्दै उक्त रिट दर्ता गरेकी हुन् । कानुन व्यवसायीहरु वरिष्ठ अधिवक्ता एकराज भण्डारी, अधिवक्ता कपिलचन्द्र पोखरेल, राजु अधिकारी र कान्तीराम ढुंगानाको सहयोगमा सर्वोच्चमा बन्द्र प्रत्यक्षीकरणको मुद्दा दर्ता गरेकी
छिन् । मुद्दामा गृह मन्त्रालय, गृहमन्त्री रामबहादुर थापा बादल, प्रहरी प्रधान कार्यालय नक्साल, महानगरीय प्रहरी प्रभाग ललितपुर, प्रभाग प्रमुख, जिल्ला प्रहरी कार्यालय काभ्रे, जिप्रका काभ्रेका प्रमुख, ललितपुर जिल्ला अदालतलाई विपक्षी बनाइएको छ ।
ओली र खड्कालाई यही चैत ९ गते काभ्रेबाट काठमाडौं फर्किने क्रममा प्रहरीले पक्राउ गरेको थियो । आफ्ना बुबा हेमन्त सुगर र प्रेसरको रोगी भएकाले नियमित औषधि सेवन गरिरहनुपर्ने दाबी गर्दै अदालतमा झिकाई तुरुन्त रिहा गर्न आदेश जारी गर्न माग गरिएको छ । त्यस्तै ओली कुनै पनि आपराधिक संगठनमा संलग्न नभएको र जिम्मेवार राजनीतिक दलमा सक्रिय रहेकोले राजनीतिक पूर्वाग्रहमा पक्राउ गरिँदा नेपालको संविधानले दिएको राजनीतिक दल खोल्न पाउने, विचार र अभिव्यक्ति स्वतन्त्रताको हनन गरी पक्राउ गरिएको सर्वोच्चमा दर्ता भएको मुद्दामा उल्लेख छ ।
प्रतिक्रिया दिनुहोस