बैशाख २२
प्रमुख सत्तारुढ नेकपा निकट विद्यार्थी सङ्गठन अखिल क्रान्तिकारी र अनेरास्ववियुले पेट्रोलियम पदार्थमा विद्यार्थी सहुलियतको व्यवस्था गर्न नेपाल आयल निगमलाई एक हप्ताको अल्टिमेटम दिएको छ ।
आइतबार निगमसमक्ष ध्यानाकर्षण पत्र बुझाउँदै विद्यार्थी सङ्गठनहरूले यसअघि सहुलियत दिने सहमति कार्यान्वयन नभएको भन्दै एक साताभित्र पेट्रोलियम पदार्थमा विद्यार्थी सहुलियत दिने व्यवस्था गर्न अल्टिमेटम दिएको हो । पेट्रोलियम पदार्थमा विद्यार्थी सहुलियत दिने, ग्यासमा विद्यार्थीहरूलाई निलो सिलिन्डर उपलब्ध गराउनुपर्ने, निगमभित्रको चुहावट र भ्रष्टाचार रोक्नुपर्ने लगायतका विषयमा यसअघि सहमति भए पनि निगमले कार्यान्वयन गरेको विद्यार्थी सङ्गठनहरूको आरोप छ ।
त्यस्तै पछिल्लो समय पेट्रोलियम पदार्थमा गरिएको मूल्यवृद्धिले थप महँगी सिर्जना गर्ने भएकाले तत्काल मूल्यवृद्धि फिर्ता लिन पनि विद्यार्थी सङ्गठनहरूले माग गरेका छन् । ध्यानाकर्षण बुझ्दै निगमका कार्यकारी निर्देशक सुरेन्द्रकुमार पौडेलले २०६७ सालदेखि निगमले कर्मचारीलाई बोनस नबाढेको दाबी गरे । उनले ग्यास र ट्याङ्करको ढुवानी भाडा महँगो पर्न गएकाले पेट्रोलियम पदार्थ सोचेजस्तो समायोजन गर्न नसकिएको बताए ।
ध्यानाकर्षणपत्र बुझाउँदै अखिल क्रान्तिकारीका अध्यक्ष रञ्जित तामाङले निगमका देखिएको समस्यालाई दिर्घकालीन रूपमा नै समाधान खोज्नुपर्ने बताए । उनले आफूहरूको सहमति कार्यान्वयन नभए कडा आन्दोलन गर्ने पनि चेतावनी दिएका छन् ।
विद्यार्थी सङ्गठनहरूले पेट्रोलियम पदार्थको बिक्रिवितरणमा एकाधिकार प्राप्त सरकारको पूर्ण स्वामित्वमा रहेको निगमले खेल्ने भूमिकालाई प्रभावकारी बनाउनुपर्नेमा पनि जोड दिएको छ ।
प्रतिक्रिया दिनुहोस