२०७६ श्रावण ११
सुर्खेत,
कर्णालीमा बाढी र पहिरोका कारण पीडित भएका परिवारलाई प्रदेश सरकारले घर बनाउन तीन लाख रुपैयाँ उपलब्ध गराउन निर्णय गरेको छ । बिहीबार बसेको प्रदेश मन्त्रिपरिषद् बैठकको निर्णयबाट मृतकका आफन्त र घरबारविहीन भएका परिवारलाई राहत उपलब्ध गराउने निर्णय गरेको हो ।
बाढी र पहिरोका कारण मृत्यु भएका व्यक्तिका आफन्तलाई एक लाख र घर पूर्णरुपमा क्षति भएका परिवारलाई तीन लाख रुपैयाँ उपलब्ध गराइने भएको हो । भूमि व्यवस्था, कृषि तथा सहकारी मन्त्री विमला केसीले प्रतिमृतक एक लाखका दरले र घर निर्माणका लागि पीडित परिवारलाई तीन लाख रुपैयाँ दिने निर्णय मन्त्रिपरिषद्ले गरेको बताइन् ।
वर्षातका कारण कर्णाली प्रदेशमा सबैभन्दा बढी डोल्पामा क्षति भएको छ । असार २८ गते डोल्पाको मुड्केचुला गाउँपालिकामा बाढी र पहिरोका कारण चार जनाको मृत्यु भएको छ । यस्तै बाढीमा बगेका अरु सात जना हालसम्म वेपत्ता छन् । यस्तै पहिरोका कारण अन्य जिल्लामा पनि धेरै परिवार घरबारविहीन बनेका छन् ।
केसीले भनिन्,‘प्राकृतिक क्षतिको विवरण संकलन भइरहेको छ, वर्षातले हाम्रो प्रदेशमा धेरै नोक्सान भयो । हामी पीडितलाई तत्काल राहत वितरण गर्नेछौं, मन्त्रिपरिषद्ले पनि पीडितलाई राहत उपलब्ध गराउने निर्णय गरेको छ ।’
यस्तै बिहीबारको बैठकमा जाजरकोटको छेडागाड नगरपालिकाको प्रशासनिक केन्द्रको बिवादबारे पनि छलफल भएको छ । यो विषयलाई मन्त्रिपरिषद्का् राजनितिक समितिमा थप छलफल गरेर मन्त्रिपरिषद्मा पेश गर्ने निर्णय गरिएको मन्त्री केसीले जानकारी दिइन् ।
त्यसैगरी जिल्लास्तरमा मन्त्रालयले एकमात्र एकीकृत कार्यालय स्थापना गर्नेगरी संगठन र व्यवस्थापनको सर्वेक्षण गर्ने निर्णय पनि प्रदेश सरकारले गरेको छ ।
प्रतिक्रिया दिनुहोस