AP Khabar२०७५ मंसिर २५, मंगलबार (५ साल अघि)
३९५ पाठक संख्या धनुषा, मंसिर २५ : विवाह पञ्चमीका अवसरमा प्रदेश २ मा दुई दिन सार्वजनिक बिदा हुने भएको छ । आज र भोली सार्वजनिक बिदा दिने प्रदेश सरकारले निर्णय गरेकोे छ ।
प्रदेश सरकारले विवाहपञ्चमी महोत्सव भव्य मनाउन भन्दै बिदा दिएको हो । सरकारले विवाहपञ्चमीमा लाखौँ भक्तजनको सहभागिता हुने अनुमान गरेको छ । हजारौँ भारतीय विवाहपञ्चमीमा सहभागी हुन जनकपुर आएका छन् ।
जनकपुरधाममा जारी सप्ताहव्यापी महोत्सवमा सोमबार राममन्दिरको रामवागमा भगवान् रामको तिलकोत्सव सम्पन्न भएको छ । यस पटक जानकी मन्दिरबाट एक हजार एक भार (कोशेली) राममन्दिरमा भगवान् रामको तिलकका लागि गएका थिए ।
जनकपुरधाम उपमहानगरपालिकाले विवाह पञ्चमीलाई भव्यरुपमा मनाउन सम्पूर्ण नगरवासीलाई आग्रह गरेको छ । नगरपालिकाद्वारा जारी गरिएको प्रेस विज्ञप्तिमा २५ र २६ गते जनकपुर शहरमा दीपावली मनाउन सर्वसाधरणलाई आग्रह गरिएको छ । उपमहानगरपालिकाभित्रको सम्पूर्ण विद्यालयको पठनपाठन बन्द गरी भव्यरुपमा दीपावली मनाउन आग्रह गरिएको छ ।
प्रतिक्रिया दिनुहोस