पौष ०८ काठमाडौँ,
अखिल नेपाल फुटबल संघ (एन्फा) को पुनरावलोकन समितिले कारबाहीमा परेका फुटबलरको निलम्बन मितिबारे नयाँ निर्णय गरेको छ ।
अनुशासन उल्लघंन गरेको भन्दै एन्फाले मंसिर २७ गतेबाट लागु हुने गरि विमल घर्तिमगर, अन्जन विष्ट, दिनेश राजवंशी र सन्तोष तामाङलाई निलम्बन गरको थियो । विमल र दिनेशलाई ९० दिन तथा अन्जन र सन्तोषलाई ४५ दिन निलम्बनसहित ५० हजार रुपैयाँ जरिवाना तोकेको थियो ।
तर मंसिर ३० गते चारै खेलाडीले गल्ति स्वीकार गर्दै कारवाही अवधि घटाइदिन अपिल कमिटि समक्ष निवेदन दिएका थिए ।
त्यसमा सुनुवाई गर्दै पुनरावलोकन समितिले नाइट क्लब गएको भोलिपल्ट कात्तिक ३० बाटै निलम्बन लागू हुने निर्णय गरेको एन्फा महासचिव इन्द्रमान तुलाधरले जानकारी दिएका छन् ।
यो निर्णयसँगै अन्जन र सन्तोषको निलम्बन पुस १५ बाट फुकुवा हुनेछ भने विमल र दिनेशको माघको ३० गते । नयाँ निर्णयसँगै चारै खेलाडीले राजधानीमा जारी सहिद स्मारक ए डिभिजन लिग खेल्न पाउने भएका छन्।
नयाँ निर्णयपछि विमल र दिनेशले लिगका अन्तिम चार खेल खेल्न पाउने भएका छन्। अञ्जन र सन्तोषले सुरूवाती चार खेल गुमाउनेछन् । यसअघिका २ खेल उनीहरुले गुमाइसकेका छन् ।
४ खेलाडीले मंसिर ३ गते कुवेतसँगको विश्व कप छनोट खेल्नका लागि भुटान जानुअघि अघिल्लो राती डिस्को गएर मादक पदार्थ सेवन गरेको भन्दै समाचार सार्वजनिक भएपछि एन्फाले कारवाही गरेको थियो ।
प्रतिक्रिया दिनुहोस