AP Khabar२०७६ पौष २१, सोमबार (४ साल अघि)
३६८ पाठक संख्या पौष २१ काठमाडौँ,
सुनको मूल्य उकालो लाग्ने क्रम सोमबार पनि जारी रह्यो । आइतबार तोलामा १ हजारले बढेर प्रतितोला ७५ हजार ५०० पुगेर नयाँ रेकर्ड बनाएको सुनको मूल्य सोमबार तोलामा ५ सयले बढेर फेरि नयाँ रेकर्ड कायम गरेको छ ।
नेपाल सुनचाँदी महासंघका अनुसार आज छापावाल सुनको मूल्य तोलाको ७६ हजार रुपैयाँ पुगेको छ । सुन महँगो भएसँगै कारोबार भने घटेको व्यवसायीले बताएका छन् ।
गएका पाँच दिनमा सुनको भाउ तोलामा झण्डै २५ सय रुपैयाँ बढेपछि कारोबार ठप्प जस्तै भएको महासङ्घको मूल्य निर्धारण समितिका संयोजक तेजरत्न शाक्यले जानकारी दिए ।
सुनको मूल्यसँगै चाँदीको मूल्य पनि आज तोलामा २० रुपैयाँले बढेको छ । आइतबार प्रतितोला ९ सय रुपैयाँमा कारोबार भएको चाँदीको मूल्य आज ९ सय २० रुपैयाँ कायम भएको महासंघले जनाएको छ ।
अन्तर्राष्ट्रिय बजारमा सुनको भाउ बढिरहेको र अझै बढ्ने अनुमान गरिएकाले नेपालमा पनि भाउ अझै बढ्ने सम्भावना रहेको संयोजक शाक्यले बताए ।
प्रतिक्रिया दिनुहोस