AP Khabar२०७६ पौष २४, बिहिबार (४ साल अघि)
३३६ पाठक संख्या पौष २४ जनकपुरधाम :
जनकपुरधाम उपमहानगरपालिकाका मेयर लाल किशोर साहले सञ्चार कर्मी माथि गरेको दुर्व्यवहारलाई लिएर युवाहरूले प्रदर्शन गरेका छन् ।
मेयर साहले सञ्चारकर्मीहरुसँग दुर्व्यवहार गरेकोले उनले माफी माग्नुपर्ने भन्दै युथ एसोसिएसन नेपाल (यान) सँग आबद्ध युवाहरूले प्रदर्शन गरेका हुन् ।
जनक चोकबाट सुरु भएको जुलुस शिव चोक हुँदै भानु चोकमा पुगेर कोणसभामा परिणत भएको थियो । कोणसभामा बोल्दै युथ एसोसिएसन नेपाल (यान) का संयोजक आदित्य नेपालले मेयर साहका कार्यकर्ताहरूले सञ्चारकर्मीहरुसँग गरेको दुर्व्यवहार निन्दनीय रहेको बताए ।
उनले भने,‘मेयर साहले आफ्ना कालो कर्तुतहरू पर्दाफास हुने डरले नै पत्रकारहरूसँग दुर्व्यवहार गरेका हुन् ।’
मेयर साहले सञ्चारकर्मीहरुसँग माफी नमागेसम्म आफूहरूको विरोधका कार्यक्रमहरू निरन्तर जारी राख्ने यानका सर्वजित् यादवले बताए ।
यान आबद्ध युवाहरूले फ्री प्रेस, पत्रकारमाथि हातपात बन्द गर, कार्यकर्ताको नाममा गुन्डा पाल्न पाईदैन, नगर प्रमुख हौँ कि नगरको माफिया, उपमहानगरपालिकाले गुन्डा राख्या छ कि कार्यकर्ता लगायतका नारा लेखिएका प्लेकार्ड समेत भुण्ड्याएका थिए ।
मङ्गलवार जानकी मन्दिरको फूलबारी अतिक्रमण सम्बन्धी समाचारका लागि सूचना लिन मेयरको कार्यकक्षमा गएका सञ्चारकर्मीहरुलाई मेयर साहका समर्थकहरूले कुटपिट गरेका थिए ।
उनीहरूको कुटाई बाट कान्तिपुर टेलिभिजनका अमरकान्त ठाकुर, एबिसी टेलिभिजनका सुमित मिश्र, देश सञ्चार डटकमका राजा झा र उज्यालो अनलाइनका सुभाष कर्ण घाइते भएका थिए ।
प्रतिक्रिया दिनुहोस