AP Khabar२०७६ माघ २१, मंगलबार (४ साल अघि)
४२० पाठक संख्या माघ २१ एजेन्सी ।
बुबालाई कोरोनाभाइरस सङ्क्रमणको आशङ्कामा छोरासँगबाट अलग्ग्याइएपछि ती छोराको मृत्यु भएको छ । बुबा र भाइबाट छुट्याएर एक्लै राखिएका १६ वर्षीय यान चेङ सेरब्रल पोल्जी अर्थात् मस्तिष्कको पक्षाघातबाट ग्रसित थिए ।
अपाङ्गता भएका ती किशोरको स्याहारसुसार गर्ने अरू कोही थिएनन् । उनलाई बुबाबाट छुट्याइएको एक सातापछि गत बुधवार मृतावस्थामा फेला पारिएको थियो । सो अवधिमा उनलाई दिनमा दुई चोटि मात्र खुवाइएको बताइएको छ ।
ती किशोरको मृत्यु भएपछि दुई अधिकारीलाई पदमुक्त गरिएको छ । कारबाहीमा पर्नेमा चिनियाँ कम्युनिष्ट पार्टीका स्थानीय सचिव र हुएच्याहका नगरप्रमुख छन् ।
स्थानीय सञ्चारमाध्यमका अनुसार आफूलाई यान चेङछोबाट छुट्याइएपछि उनका बुबाले लोकप्रिय चिनियाँ सामाजिक सञ्जाल वेबोमा सहयोगको याचना गर्दै लेखेका थिए । उनका अनुसार यान चेङलाई खानेकुरा र पानीबिना एक्लै छोडिएको थियो ।
यान चेङबारे सामाजिक सञ्जालमा व्यापक चर्चा भएको छ । उनीहरु कोरोनाभाइरस प्रकोपको केन्द्रबिन्दु मानिएको हुबे प्रान्तका बासिन्दा हुन् । सेरब्रल पोल्जी बाल्यकालदेखि नै देखिन्छ ।
उक्त परिस्थिति भएका मानिसमा हिँडडुल र शारीरिक समन्वयको समस्या हुन्छ। केही पीडित व्यक्तिमा गम्भीर खालको अपाङ्गता पनि हुन्छ ।
कोरोनाभाइरसको सङ्क्रमण फैलिएपछि चीनमा कम्तीमा ४२५ जनाको मृत्यु भइसकेको छ भने २० हजार जनाभन्दा बढीमा सङ्क्रमण भएको पुष्टि भएको छ ।
चीनबाहिर विभिन्न देशमा पनि सङ्क्रमित व्यक्तिहरू फेला परेका छन्। तर ती देशमा अहिलेसम्म फिलिपिन्समा एक जनाबाहेक अरूको मृत्यु भएको छैन ।
विश्व स्वास्थ्य सङ्गगठनले कोरोनाभाइरस सङ्क्रमण भएका मानिसको सङ्ख्या अझै बढ्न सक्ने चेतावनी दिएको छ।
प्रतिक्रिया दिनुहोस