७२ पाठक संख्या
पत्रकारहरुको छाता संस्था नेपाल पत्रकार महासंघको केन्द्र, प्रदेश र जिल्ला तथा प्रतिष्ठान शाखाहरुको नतिजा सार्वजनिक भइरहेको छ ।शुक्रबार मतदान सकिए लगत्तै कतिपय मतगणना सुरु भएको थियो । केन्द्रीय निर्वाचन समितिले नतिजा आइरहेको तर एकीकृत गर्न बाँकी रहेको जनाएको छ ।
नेपाल प्रेस युनियनका उपाध्यक्ष नकुल अर्याल परिणाम आउनेक्रम जारी रहेको बताउँछन् । चुनावमा प्रेस युनियन र प्रेस चौतारीले गठबन्धन गरेका थिए ।
प्रेस सेन्टर नेपालका महासचिव सन्तोष पौडेलका अनुसार १५ जिल्ला अध्यक्षमा सेन्टर समर्थित उम्मेदवार विजयी भएका छन् । तीन वटा प्रदेशमा सेन्टर समर्थित उम्मेदवार विजयी भएका छन् । सेन्टर समर्थित उम्मेदवारले बागमती प्रदेश, एशोसिएट प्रदेश र उपत्यका प्रदेशको नेतृत्वमा जित हात पारेको हो ।
पत्रकार महासंघको एसोसिएट प्रदेश समितिको अध्यक्षमा रोयल आचार्य विजयी भए । बागमती प्रदेश अध्यक्ष कृष्ण सारू मगर र उपत्यका प्रदेश अध्यक्ष टेनिस रोकाले विजय प्राप्त गरे ।
काठमाडौं उपत्यकाबाट केन्द्रीय सदस्यमा सूर्य सुवेदी र अर्जुन पन्त निर्वाचित भएका छन् । प्रतिष्ठान प्रदेशबाट पत्रकार महासंघको केन्द्रीय सदस्यमा वीरेन्द्र ओली र सविता शर्मा निर्वाचित भए । ओली प्रेस सेन्टरका हुन भने शर्मा प्रेस चौतारी नेपाली हुन् । शर्मालाई प्रेस युनियन र चौतारीको समर्थन थियो ।
नेपाल पत्रकार महासङ्घ गण्डकी प्रदेशको अध्यक्षमा रमेश पौडेल निर्वाचित भएका छन् । निकटतम प्रतिस्पर्धी गोविन्द सुवेदीलाई पराजित गर्दै रमेश अध्यक्ष निर्वाचित भएका हुन् । रमेश प्रेस चौतारी र प्रेस युनियनको गठबन्धनका उम्मेदवार हुन् भने गोविन्द प्रेस सेन्टर र समाजवादी प्रेस सङ्गठनका उम्मेदवार हुन् ।
सुदूरपश्चिम प्रदेश पत्रकार महासंघको अध्यक्षमा भरतबहादुर शाह निर्वाचित भएका छन् । शाह प्रेस युनियन र प्रेस चौतारीको साझा उम्मेदवार हुन् ।
प्रतिक्रिया दिनुहोस