३१ पाठक संख्या
नेपाल विद्युत् प्राधिकरणले साँझको समयमा वीरगञ्ज–पथलैया औद्योगिक कोरिडोरमा दैनिक चार घण्टा विद्युत् कटौती गरेपछि उद्योगी व्यवसायी समस्यामा परेका छन् ।
प्राधिकरणले मागअनुसारको विद्युत् आपूर्ति गर्न नसकेपछि औद्योगिक कोरिडोरमा कटौती गर्न थालेको हो । प्राधिकरणले अहिले बेलुकी ५ बजदेखि ९ बजेसम्मको ‘पिकआवर’मा औद्योगिक कोरिडोर क्षेत्रमा विद्युत् कटौती गर्दै आइरहेको छ ।
वीरगञ्ज उद्योग वाणिज्य सङ्घका अध्यक्ष अनिलकुमार अग्रवालले प्राधिकरणले विद्युत् कटौती गरेसँगै कोरिडोरका उद्योगले आफ्नो क्षमताअनुसार उत्पादन गर्न नसकेको बताए ।
सङ्घले विज्ञप्ति निकालेर अघोषित लोडसेडिङका कारणले उद्योगधन्दा सञ्चालनमा अप्ठेरो परेको जनाएको छ ।
विद्युत् कटौतीको बेला डिजेल प्लान्टबाट उद्योग सञ्चालन गर्नुपर्दा उत्पादन लागत बढ्न गई उद्योगहरुले आफ्नो प्रतिस्पर्धात्मक क्षमता गुमाउँदै गएका र कतिपय उद्योग नै बन्द राख्नुपर्ने अवस्था रहेको विज्ञप्तिमा उल्लेख छ ।
सङ्घका अध्यक्ष अग्रवालले विद्युतको समस्यालाई तत्कालै सम्बोधन गर्न प्राधिकरणसँग माग गरे ।
नेपाल विद्युत् प्राधिकरण वीरगञ्ज वितरण केन्द्रका प्रमुख अवधेशकुमार दुबेले साँझको पिकआवरको समयमा केही समय विद्युत् कटौती हुँदै आएको जानकारी दिए । सकेसम्म विद्युत् कटौतीको समस्यालाई सम्बोधन गर्ने प्रयास भइरहेको उनको भनाइ छ ।
प्रतिक्रिया दिनुहोस