भारतमा विरोध प्रदर्शन जारी, १४ काे मृत्यु

कानुनको विरोधमा विभिन्न संघ–संगठनले संयुक्त रुपमा शनिबार केन्द्रीय रेल वे स्टेसनमा बृहत् प्रदर्शन गरेका छन् । उनीहरुले कानुनका विरुद्धमा प्ले कार्ड तथा व्यानरसहित नाराबाजी गरेका थिए ।

विरोध प्रदर्शन गरिएका ठाउँहरुमा ठूलो संख्यामा सुरक्षाकर्मी परिचालन गरिएको अधिकारीहरुले जनाएका छन् । कतिपय ठाउँमा प्रदर्शनकारी र सुरक्षाकर्मीहरुबीच झडप भएको छ । जारी प्रदर्शनमा हालसम्म ज्यान गुमाउनेको संख्या १४ पुगेको छ ।

प्रदर्शनका कारण राजधानी नयाँदिल्लीलगायत खासगरी मुसलमान समुदाय रहेका शहरी क्षेत्रहरूमा जनजीवन प्रभावित बनेको स्थानीय टेलिभिजनहरूले उल्लेख गरेका छन् ।

प्रदर्शनकारीले ढुंगामुढा, आगजनी र तोडफोड गरेका छन् भने भीड नियन्त्रणका लागि प्रहरीले विशेष बलको प्रयोग गरेको छ । सरकारले हालै ल्याएको नयाँ कानुनी व्यवस्थाले विवादास्पद आप्रवासीलाई भारतको नागरिकता दिने व्यवस्था गरेसँगै देशव्यापी रुपमा आन्दोलन चर्किएको हो ।

नयाँ व्यवस्थाले पाकिस्तान, बंगलादेश र अफगानिस्तानबाट आएको प्रमाण पेश गर्ने हिन्दू, शिख, बौद्ध, जैन, पारसी र इसाइ धर्मावलम्बीले भारतको नागरिकता पाउने भएका छन् ।