८२ पाठक संख्या
धनगढी- सुदूरपश्चिम प्रदेशमा जनस्वास्थ्यको अवस्था सुधारका लागि अझै निकै प्रयास गर्नुपर्ने सरोकारवालाहरूले औंल्याएका छन् ।
अहिले पनि स्वास्थ्यका कतिपय सूचकहरु कमजोर रहेकोले सबै पक्षबीच समन्वय र सहकार्य अझ बलियो बनाउनु पर्ने सरोकारवालाहरूको धारणा छ ।
सुदूरपश्चिम प्रदेशको गत आर्थिक वर्षको स्वास्थ्य कार्यक्रमहरुको एकीकृत समिक्षा सकिएको छ । तीन दिनसम्म सञ्चालन भएको समिक्षा गोष्ठीमा स्वास्थ्य क्षेत्रमा विद्यमान समस्या र चुनौतिका साथै आगामी दिनमा गर्नुपर्ने प्रयासहरूबारे छलफल भएको छ ।
समिक्षा गोष्ठीमा प्रस्तुत जिल्लागत स्वास्थ्य स्थितिको अवस्थामाथिको छलफलका क्रममा सहभागी स्वास्थ्य अधिकारी तथा विज्ञहरूले प्रदेशमा स्वास्थ्य सेवा सुधारका लागि थप परिश्रम आवश्यक रहेको औंल्याए ।
प्रदेश स्वास्थ्य निर्देशनालयका पूर्व निर्देशक डाक्टर गुणराज अवस्थीले देशको स्वास्थ्य अवस्था सुधारोन्मुख रहे पनि सुदूरपश्चिम प्रदेशमा अझै कमजोर रहेको बताए । उनका अनुसार मातृ सुरक्षा र नवजात शिशु स्याहार कार्यक्रमलाई प्रभावकारी बनाउनु आवश्यक रहेको छ ।
प्रदेशका नवजात शिशु मृत्यूदर अझै पनि उच्च रहेको उनको भनाइ छ । सुदूरपश्चिम प्रदेश सामाजिक विकास मन्त्रालयका सचिव चक्रपाणि पाण्डेय स्वास्थ्य सेवा क्षेत्रका तथ्यांकहरुका आधारमा प्रदेशमा स्वास्थ्य अवस्था कमजोर रहेको देखिएको बताउँछन् ।
स्वास्थ्य क्षेत्रमा पूर्वाधार विस्तारको तुलनामा स्वास्थ्य सूचकहरु कमजोर रहेको उनको भनाइ छ ।
सचिव पाण्डेयले स्वास्थ्य क्षेत्र सुधारका लागि जनशक्ति व्यवस्थापन हुनु अपरिहार्य रहेको बताए । सुदूरपश्चिम प्रदेशमा अझै पनि दरवन्दी भन्दा ४५ प्रतिशत कर्मचारी अभाव रहेको उनको भनाइ छ ।
सचिव पाण्डेय कतिपय स्वास्थ्यकर्मीहरुको दलगत राजनीति मोहका कारण पनि समस्या भइरहेको बताउँछन् । प्रदेशका सामाजिक विकास मन्त्री मेघराज खड्काले पनि सुदूरपश्चिम प्रदेशमा स्वास्थ्य क्षेत्रको अवस्था कमजोर रहेको स्वीकारे ।
उनले आफूहरू सरकारमा आउँदा बजेट शून्यताको अवस्था रहेको र हतारमा बजेट ल्याउनु परेका कारण चाहेजस्तो गर्न नसकिएको बताए ।
प्रतिक्रिया दिनुहोस